குஷ்பூ - அர்(ன)த்தங்கள்

தமிழ் வளர்க்கும் காலத்தே மொழியின் வளமையையும், அதன் தொன்று தொட்ட பின்புலத்தையும், கலாச்சார உணர்வுகளையும், கலகக் காரணிகளையும் சற்றே சீர் தூக்கிப் பார்க்க வேண்டியது காலத்தின் கட்டாயமாகிப் போய்விட்டது.

குறிப்பு: தனித்தமிழ் என்பது முயற்சியா அல்லது அயற்சியா என்பதைப் பற்றி வாதம் செய்ய இப்போது நேரமில்லை. பின்னர் விரிவாகப் பதியலாமென்று இருக்கின்றேன். இருப்பினும் தனித்தமிழாய் என் பதிவு வாசிக்கப்பட்டால் அதற்கு நான் பொறுப்பில்லை.

குஷ்பூ என்னும் சொல்லுக்கு தமிழில் பொருள் என்ன? மணம், நாற்றம், வாசம், வாசனை என்று பல பொருட்கள் கொள்ளலாம்.

முதல் சொல்லான மணத்தைப் பற்றி பார்க்கலாம். அம்மணத்தின் பொருள் என்ன? மணம் என்றால் திருமணமென்றும் பொருள்படும். இரண்டிற்கும் தொடர்பென்ன? மகரம் மௌனமாக அமணம் என்றும் ஒரு சொல் பிரயோகத்தில் உள்ளது. அகரம் என்றுமே எதிர்மறைப் பொருளில்தான் (எ.கா. விசுவாசம் X அவிசுவாசம்) வருமென்று எங்கேயோ படித்ததாய் நினைவு. அப்படியென்றால் மணம் என்னும் சொல்லுக்கு அமணம் எதிர்மறையா? நாசிக்கு உவப்பானது நறுமணம். இன்னும் வளமை, செழுமை, மரியாதைக்குண்டான, உயரிய என்றும் பொருட்களும் கொள்ளலாம்.

அடுத்தது நாற்றம். நாற்றம் என்பது பொதுவாகவே எதிர்மறை பொருளிலேயே பயன்படுத்தப்பட்டோ, உணரப்பட்டோ வந்திருக்கின்றது. ஆனால் துர்நாற்றமே சரியான எதிர்மறை பயன்பாடு. வலைநாற்றமென்றால் என்னவென்று கூறுங்களேன். பரிசாக கும்பிநாற்ற நூல் பரிசு.

அடுத்தது வாசம். வாசமென்றால் மணமென்ற பொருள் தந்தாலும் வேறு பல அர்த்தங்களும் ஒன்று. உறைவிடம். வசிப்பிடம் (எ.கா. வாசத்தலம்). ராணிவாசம் என்றால் அந்தப்புரம் என்று பொருள். வாசம் தரும் பொருட்கள் வாசனாதி திரவியங்கள். ஏன் ஆடை, வஸ்திரம், துண்டு என்ற பொருட்களும் உண்டு. இறகு, இறக்கை, நீர், நெய், உணவு, மந்திரம், வேகம், கைமரம், பேச்சு, வார்த்தை, வாக்கியம் ஏன் சரஸ்வதியையே குறிக்கின்றது. இத்தனை வாசங்களை கண்டபின் ஆவாசமாயிருக்கின்றதா? அஞ்ஞாதவாசம் போனவர்கள் பதில் சொல்லுங்கள்.

கடைசியாக வாசனை: பிறர் சேர்க்கையால் உண்டாகும் சில/பல பழக்க வழக்கங்கள் என்றும் பொருள் கொள்ளலாம் (எ.கா. சேர்க்கைவாசனை). முற்பிறவிப்பயனால் இப்பிறவியில் நடந்து கொள்ளும் முறை எனலாம். இவ்வாசனையை கட்டுவோருமுண்டு. வாசனை தட்டுவோருமுண்டு. வாசனைப் பொடி தூவுவோருமுண்டு.

முடிவாக குஷ்பூ என்ற பதத்திற்கு அவரவர் நாசிமண்டலத்தின் உணரரும்புகளுக்குத் தக்கவாறு, உணரும் தன்மைக்கேற்றவாறு பொன்மலரும் நாற்றமுடைத்து என்று நேர்/எதிர்/நேரெதிர் மறைகளாகவோ அல்லது எங்கோமணம் மணக்கின்றது என்று விஷயவாசனையின்றி பொதுப்படையாகவோ (அ·தாவது ஜல்லியடிப்பது) அ(ன)ர்த்தம் கொள்ளலாம்.

பி.கு. இப்பதிவு முழுக்க முழுக்க குஷ்பூ என்னும் பதத்திற்கு (இந்தியா, உருதுவா, சமஸ்கிருதமா என்று ஆராய்ச்சி நடக்கின்றது) தமிழில் விளக்கங் காணும் ஒரு அறிவிலியின் முயற்சியே. தனிநபரைக் குறித்த பதிவென்று தப்பர்த்தம் கொண்டு பின்னூட்டத்தில் பிளந்து கட்ட வேண்டுவோர்களுக்கு இப்போது பதிலளிப்பதாய் எண்ணமில்லை. பதிவிற்கு உதவிய செம்மொழி வளர்க்கும் மதறாஸ் பல்கலைக்கழக அகராதிக்கு மனமார்ந்த நன்றி !!!