இலக்கியம் For Dummies

இலக்கியம் என்றால் பலருக்கு ஒவ்வாமையாக இருக்கின்றது. இதோ எதற்கெல்லாமோ கையேடு போட்டுக்களித்தவர்கள் அதிமுக்கியமான இத்தலைப்பை மட்டும் விட்டுச் சென்றனர். இதோ இலக்கியம் For Dummies:

1. இலக்கியம் எத்தனை வகைப்படும்?

இலக்கியம் சிற்றிலக்கியம், பேரிலக்கியம் என்று இரு வகைப்படும். சிற்றிலக்கியம் என்றால் புரியாமல் புரியும்படியும், பேரிலக்கியம் என்றால் புரிந்தும் புரியாமலும் இருக்கும். சுருங்கச் சொல்லின் சிற்றிலக்கியம் சிற்றிதழ்களிலும், பேரிலக்கியம் வெகுசன விரும்பும் ஊடகங்களிலும் தென்படும்.

2. இலக்கியம் படைப்பது எப்படி?

அதி முக்கியமான கேள்வி. முதலில் தனக்குப் பிடித்த அல்லது பிடிக்காத தலைப்பைத் தேர்ந்தெடுத்துக் கொள்ள வேண்டும். பிடிக்காத இலக்கியவாதிதான் உங்கள் தேர்வு என்றால் உங்களுக்கு இலக்கியம் வசப்பட்டு விட்டதென்று அர்த்தம். பின்னர் ஏன் பிடிக்கவில்லை என்று குத்துமதிப்பாக 20 உப-தலைப்புகளைப் பட்டியலிடுங்கள். அந்த 20 உப-தலைப்புகளில் உங்களுக்கு தோதானபடி மற்ற யார் யாரெல்லாம் அதே இலக்கியவாதியைத் திட்டியிருக்கின்றார்கள் என்பதை சப்பைக் கட்டாக இட்டு நிரப்ப வேண்டும்.

3. இலக்கியத்தில் புள்ளி விவரங்களின் பங்கு என்ன?

புள்ளி விவரம் இல்லையென்றால் அது தரமான இலக்கியமே இல்லை. அக்பர் பீர்பாலிடம் தனது சாம்ராஜ்யத்தில் எத்தனை காகங்கள் இருக்கின்றதென்று வினவ பதிலாய் ஒரு எண்ணிக்கையைச் சொன்னார் பீர்பால். இதில்தான் இலக்கியமே அடங்கியிருக்கின்றது. காகங்களை கணக்கெடுத்து பீர்பாலின் எண்ணிக்கை தவறென்று அக்பர் சொன்னாலும், காகங்கள் பறந்து போயின; இன்றேல் புதிய காகங்கள் பறந்து வந்தன என்று சால்ஜாப்பு ஜல்லியடிக்கத் தெரிந்து இருத்தலே சிறந்த இலக்கியவாதியின் பண்பு. குறிப்பாக காலவோட்டம் (Chronology of Events) இலக்கியத்தில் முக்கிய பங்காற்றுகின்றது. எடுத்துக்காட்டாக "பாசு சபையைச் சேர்ந்த பாஸ்டன் பாம்பிரிட்ஜ், போஸ்ரனில் 1970'களில் காலாபாணி என்ற அமைப்பை நிறுவி வெகுஜன ஊடகத்தை தமது நூல்களில் விமர்சித்தார்... 1980'களில் புதுப் பாய்ச்சல் 1990'ல் பிளா பிளா பிளா (உபயம்: பாரா) 2000'ல் etc. etc. etc. (உபயம்: அகர தூரிகை)." ஆங்கில நூல்களில் கடைசியில் பொதுவாக காலவோட்டதைப் பற்றி சிறுகுறிப்புக் காணப்படும். ஆனால் தமிழ் இலக்கியத்தில் இதுதான் முக்கிய இழை.

4. இலக்கியத்தில் தமிழ்ப் பதங்களின் பயன்பாடு யாவை?

அப்பிடிக் கேளுங்க. சொல்லுதேன். பாவிப்பய. பட்டுக் கிடப்பென். மூதி. என்ற பதிவைக் காணோம்ங்க. இது போன்ற வழக்குச் சொற்கள்/சொற்றொடர்கள் யாவும் பேரிலியக்கியத்தில் காணப்படும். தப்பித் தவறி கூட இவை சிற்றிலக்கியத்தில் தோன்றலாகாது. கட்டுடைத்தல், நிறுவனமயமாக்கல், சர்சித்தல், தர்கம், இட வல சாரியம், ஒற்றைப் பரிமாணம், தாழ்வு மனப்பிறழ்வு, பிளவாளுமை, நுகர்வு, நகை முரண் போன்ற சொல்/சொற்றொடர்களை தாராளமாய் அள்ளித் தெளிக்க வேண்டும். உ.ம். FEMA'வின் மைக் பிரௌன் கேட்ரீனாவின் தாக்கத்தை முழுமையாக உணரவில்லை. இதனால் ஏகப்பட்ட உயிர்கள் மற்றும் உடைமைகள் அழிந்தன. இது பேரிலக்கிய வகை. வலதுசாரி வன்முறையில் ஊறித் திளைத்து, பணம் படைத்தவரையே பாதுகாக்கும் ஒற்றைப் பரிமாணம் கொண்ட பிரௌன் போன்றோரின் உயர்வு மனப்பிறழ்வு காரணமாய் கேட்ரீனாவின் தாக்கம் பல்மடங்கு பெருகி சாதரண நுகர்வோருக்கு கடும் சிரமம் கொடுத்தது. இது சிற்றிலக்கியம்.

5. மேற்கோள்கள்?

மேற்கோள்கள் இல்லாமல் இலக்கியமேயில்லை. தமிழிலே ஆயிரமாயிரம் படைப்புகள் இருப்பினும் பாரதியின் 'சென்றிடுவீர் எட்டுத்திக்கும்' என்ற ஆணையை சிரமேற்கொண்டு (இதுவே மேற்கோள்தான்) ஹெமிங்வே, உருகுவே, பராகுவே என்று 'left right & center' அள்ளித் தூவ வேண்டும். மேலும் வாயில் நுழைய மறுக்கும் பெயர்கள் தேவையெனில் கூகிள் தேடுபொறியின் உதவியை நாடலாம்.

பி.கு. இன்னும் உமது சந்தேகங்களை எமக்குத் தெரியப்படுத்தவும். கேள்வி-பதில்கள் அனைத்தும் தொகுக்கப்பட்டு விக்கும்பீடியாவில் விரைவில் வெளியாகும்.